Inyunay-unay ti Malacañang a saan nga ammo ni President Ferdinand “Bongbong” Marcos Jr. ti imbutaktak ni sigud a Department of Public Works and Highways (DPWH) Secretary Manuel Bonoan seknan iti maipagarup a ₱24-billion “leadership fund” a nailatang para kadagiti senador.
Sigun kenni Palace Press Officer Undersecretary Claire Castro, saan a mapasamak daytoy no ammo ti Presidente.
Innayon ni Atty. Castro a no dadduma, sililimed a maaramid ti kastoy a katulagan.
Innayon ti opisyal a saan metlaeng nga ammo ti agdama a DPWH Secretary a ni Vince Dizon ti nasao a fund allocation.
Maipalagip nga iti testimonya ni Bonoan iti Sandiganbayan, kinunana nga adda ti “leadership fund” nga inlatang ti DPWH para kadagiti Senador nga agirekomendar iti listaan dagiti proyekto.
Sigun iti sigud a sekretario, aggatad iti ₱500 million ti alokasion para iti tunggal senador, idinto a dumanon iti ₱1 billion ti pondo para kadagiti senador a mangidadaulo kadagiti komite.