Nangipila ti Philippine National Police ken ti National Bureau of Investigation ti murder complaint kontra kenni Bureau of Corrections (BuCor) chief General Gerald Bantag ken dagiti dadduma pay nga indibidual a nairaman ti naganna iti panakapapatay daydi broadcaster Percy Lapid.
Ni General Bantag ket nasuspendir idi napan a bulan kasaruno ti maatap nga ipupusay ti middleman a ni Jun Villamor bayat nga adda iti New Bilibid Prison.
Maysa ni General Bantag kadagiti 160 a personalidad nga inkonsidera ti pulisya kas persons of interest iti panakapapatay ti radio broadcaster a daydi Percy Lapid.
Kabayatanna, nagpresentar ni Joel Escorial nga isuna ti gunman iti panakapapatay ni Lapid nu sadino kinunana nga imbilin daytoy ti mannagan “Bantag.”
Saan a dinakamat ni Escorial ti pakabuklan a nagan ti dakdakamatenna a “Bantag” ngem ni Gerald Bantag ti director general ti BuCor iti daydi a panawen.
Awan pay ti sungbat ni General Bantag seknan iti daytoy.
Nupay kasta, impeksa met dagiti taga-Cordillera ti suportada iti kailyan a ni General Bantag gaputa mamati dagitoy a nasayaat ti panagpuspusona.
Kidkiddawen dagiti taga-Cordillera ti patas nga imbestigasyon tapno madusa dagiti nakabasol ken mawaya wayaan dagiti inosente a napabasol laeng iti nasao a krimen.//caraS