LA TRINIDAD, BENGUET – Mangnamnama ti Mayor ti La Trinidad, Benguet a tungpalen ti Department of Public Works and Highways ti kari dagitoy a maipalpas ti kontruskyon ti Pines Park bridge idiay Balili, La Trinidad, Benguet inton Oktobre 10, 2023.
Iti interview ti Bombo Radyo, kinuna ni Mayor Romeo Salda, 57% ti nalpas iti nasao a proyekto kas maibasar iti report dagiti project engineer.
Sigun pay kenni Salda, inlawlawa dagiti project engineer kadakuada nga awan kanu ti makita nga agtrabtrabaho iti rangtay gaputa nalpasen a naimuntar dagiti poste nu sadino ur-urayenda laengen ti imported nga steel girdle a maar-aramid idiay Pampanga.
Iti kanito a malpas ti nasao a materyales ket tuloy-tuloy kanu ti konstruksyon agingga a makompleto inton Oktobre 10.
Maipalagip a nangrugi ti kontruskyon ti Pines Park bridge idi pay October 11, 2022.
Dumanon met iti P77 million ti nailatang a pundo para iti nasao a proyekto.