Nakaruaren iti ospital dagiti uppat a pasahero a nadangran iti panakatumba ti pampasahero a bus sadiay Km 24. Caliking, Atok, Benguet itay alas tres ti malem.
Iti interview ti Bombo Radyo, dinakamat ni PMaj. Gregorio Kiwalan, dadaulo ti Atok MPS, nagtaud ti bus manipud Baguio City ken paturong sadiay Bontoc, Mt Province idi napasamak ti aksidente.
Dumanon iti dua pulo ket pito ti pasahero daytoy nu sadino uppat kadagitoy ti nagsagrap ti minor injuries.
Sigun iti opisyal, inmakar dagiti dadduma a pasahero iti maysa a bus a paturong metlaeng sadiay Mt. Province bayat a dagiti dadduma ket nagsublida sadiay La Trinidad, Benguet.
Immunan a naduktalan iti imbestigasyon a napukawan ti bus ti preno rason a naidungpar iti igid ti kalsada agingga a natumba daytoy.
Sigun kenni Kiwalan, nakagles ti kalsada gaputa nabasa daytoy ken naangep pay ti nasao a disso.
Impetteng met ti opisyal a masansan ti aksidente sadiay Atok, Benguet ngem kaadoan kadagitoy ket self-accident ken manmano ti collision.
Gapu iti daytoy, pinalagipan manen ti opisyal dagiti biyahero nga agannad dagitoy iti panagmaneho tapno maliklikan ti aksidente.