Agarup P1.2 milion a gatad ti maatap a dried marijuana leaves nga addaan iti “fruiting tops” ti nakumpiskar dagiti kameng iti PNP Drug Enforcement Group Special Operstions Unit Cordillera Administrstive Region (PNP DEG SOUCAR) idi June 20 idiay Barangay Bulanao, Tabuk City, Kalinga babaen iti naisayangkat a buy-bust operation.
Maibasar iti report, dumanon iti sangapulo a pidaso iti rectangular form ti maatap a namaga a marijuana nga addaan iti “fruiting tops” a naibalkot iti vacuum-sealed transparent plastic nga agdagsen iti agarup sangapulo a kilo ti nakumpiskar.
Ti nasamsam a maatap a marijuana ket naala manipod iti dua nga indibidual nga aginnayan-ayat nga agpada nga awanan iti trabaho ken residente idiay Tinglayan, Kalinga.
Ti lalaki ket agtawen iti 25, alyas “Sativa/Chie,” maibilang a maysa a High Value Indibidual (HVI) ken ti babai nga agtawen iti 30, alyas “Lin.”
Nakumpiskar pay manipod kenkuana ti sumagmamano a non-drug items a kas iti kuarta, selpon, kutsilyo, motor, brown carton box, ken shoulder bag.
Balligi ti nasao nga operasion babaen iti SOU CAR, PNP DEG (Lead Unit), Kalinga Provincial Intelligence Unit (KPIU), Philippine Drug Enforcement Agency CAR-Kalinga Provincial Office (PDEA CAR-Kalinga PO), Kalinga Provincial Drug Enforcement Unit (KPDEU) RMFB 1503rd ken Tabuk City, Police Station.
Kabayatanna, ti suspek ket naiturn-over iti Tabuk City Police Station para iti temporario a kostudia bayat a dagiti nakumpiskar a drug evidence ket naiturong iti Kalinga Provincial Forensic Unit para iti Qualitative ken Quantitative Examination.
Dagiti met non-drug evidences ket adda iti kustodiya ti PNP DEG SOU CAR. | via Bombo Noveh Organo