BAGUIO CITY – Linawlawagan ti maysa a konsehal ti Atok, Benguet nga awan ti dress code a nairaman iti bukbuklen dagitoy a Tourism Code ti munisipyo.
Iti panakiuman ti Bombo Radyo Baguio, kinuna ni Councilor Marilou Zarate nga iti umuna a panagbasa ken iti public consultation iti Tourism Code ti Atok ket dagiti laeng rumbeng nga aramiden dagiti turista nga apan sadiay ken ti kapasidad ti tunggal tourist site ti napagsaritaan dagitoy.
Inyunay-unayna a saan nga iparit ti lokal a gobyerno ti Atok ti panagsuot dagiti turista iti bado a komportable kadagitoy kas iti shorts nangruna no ti gagara dagitoy ket riknaen ti lam-ek ti klima sadiay.
Patienna met a biddut ti panakaipapan ti termino nga “appropriate dress to be worn” a nailanad iti Tourism Code ti munisipyo.
Dinakamatna a siguden nga ipakpakaawatda kadagiti turista a nalammin sadiay Atok tapnu ammo dagitoy ti umno a bado nga isuotda.
Innayon pay ni Coun. Zarate a nairaman iti Tourism Code ti Atok ti mandatory registration dagiti turista gaputa mangibangonda iti Tourist Assistance Center ken ditoy metlaeng nga agbayad dagiti turista iti environmental fee.
Nupay kasta, iti agdama ket nakarikep paylaeng kadagiti turista dagiti tourist destinations sadiay Atok.
