𝗡𝗮𝗻𝗴𝗮𝘁𝗼 𝗮 𝗯𝗶𝗹𝗮𝗻𝗴 𝗱𝗮𝗴𝗶𝘁𝗶 𝗸𝗮𝘀𝗼 𝘁𝗶 𝗰𝗵𝗶𝗹𝗱 𝗮𝗯𝘂𝘀𝗲 𝗱𝗶𝘁𝗼𝘆 𝗕𝗮𝗴𝘂𝗶𝗼 𝗖𝗶𝘁𝘆, 𝗮𝗴𝘁𝘂𝗹𝘁𝘂𝗹𝗼𝘆 𝗮 𝗺𝗮𝗶𝗹𝗶𝘀𝗹𝗶𝘀𝘁𝗮; 𝗱𝗮𝗴𝘂𝘀 𝗮 𝗽𝗮𝗻𝗮𝗻𝗴𝗶𝗿𝗲𝗽𝗼𝗿𝘁 𝗶𝘁𝗶 𝗼𝘁𝗼𝗿𝗶𝗱𝗮𝗱 𝗸𝗮𝗱𝗮𝗴𝗶𝘁𝗶 𝗺𝗮𝗶𝗺𝗮𝘁𝗮𝗻𝗴𝗮𝗻 𝗮 𝗸𝗮𝘀𝗼 𝘁𝗶 𝗰𝗵𝗶𝗹𝗱 𝗮𝗯𝘂𝘀𝗲, 𝗺𝗮𝗶𝘆𝗮𝗽-𝗮𝗽𝗲𝗹𝗮

BAGUIO CITY – Agtultuloy a mailislista ti nangato a bilang iti kaso ti child abuse wenno panagdangran kadagiti ubbing ditoy siudad ti Baguio.

Sigun kenni City Social Welfare and Development Officer Betty Fangasan, nailistada ti 71 a kaso ti panag-abuso iti ubing iti laeng tallo a bulan, partikular iti Enero agingga Marso ti agdama a tawen manipud iti 76 nga insidente iti kapada a kaso idi napalabas a tawen.

Kinunana a kaaduan kadagiti biktima ti child abuse ket babbai a dimmanon iti 52 bayat a 20 ti insidente ti panagmolestia ken 18 ti insidente ti pisikal a panagdangran.

Dinakamatna a dua kadagiti insidente ti panagmolestia ti naidanun iti korte bayat a manarimaan ti panakatalantan dagiti dadduma a kaso ti child abuse.

Innayonna a sumagmamano kadagiti suspek dagiti kaso ti child abuse ket miembro metlaeng ti pamilya wenno karelasyon ti biktima.

Nupay kasta, kinuna ni Fangasan nga agtultuloy ti panangipaayda ti tulong kadagiti ubbing a biktima ti panagabuso kagiddan ti panakibinnadangda iti nagduduma a grupo tapnu maipaka-awat iti publiko ti kinapateg iti dagus a panagireport iti insidente ti child abuse.