Dinadael dagiti kameng iti Philippine Drug Enforcement Agency (PDEA) ti nasurok ₱16 billion a balor iti iligal a droga idi laeng kalman iti Integrated Waste Management facility idiay Trece Martires City, Cavite.
Pakairamanan daytoy ti nasurok 2 million a gramo iti solid illegal drugs ken nasurok 14,000 milliliters met dagiti liquid illegal substances a nadadael babaen iti thermal decomposition wenno thermolysis.
Dagiti iligal a droga ket pakairamanan iti shabu (methamphetamine), marijuana, ecstasy, cocaine, ken daduma pay a maiparit a substances a nakumpiskar kadagiti naipatungpal nga anti-drug operations sipud 2021 agingga 2025.
Sakbay ti proseso, nangipatungpal pay dagiti PDEA chemists iti confimation tests tapno maberipikar nu dagiti substances ket pudno nga iligal a droga.
Ti thermal decomposition process ket naipatungpal iti las-ud iti 12 nga oras nga heating period ken kanayonan pay a 12 nga oras para iti cooling daytoy.
Kabayatanna,inlawlawag ti nasao nga ahensya a kaadwan kadagiti nakumpiskar nga iligal a droga ket ita laeng a nadadael gapu ta dagitoy ket paset pay iti court process ken mabalin laeng a dadailen nu nangipaiyulogen ti maseknan a korte iti official destruction orders.
