BAGUIO CITY- Pimmusay ti maysa a construction worker bayat nga agpapaagas ita iti Benguet General Hospital ti maysa a kadwana kalpasan a binagsol ti saan pay a nabigbig a suspek sadiay Km. 5 La Trinidad, Benguet itay laeng nabiit.
Nabigbig ti pimmusay a ni Jaygar Loguibes Batay-an, 26-anyos bayat a ti kadwana a nadangran ket ni Jaymore Mangibat Baliw-an, 20 anyos, agpada a residente ti Km.5 La Trinidad, Benguet.
Maibasar iti inisyal nga imbestigasyon ti La Trinidad MPS, nagtaud dagiti biktima iti merkado publiko ken paawid dagitoy iti pagtaenganda idi immasideg kadakuada ti maysa a lalaki a nakasuot ti puraw a t-shirt.
Killaat a dinanug ti suspek dagiti dua a biktima nga awanan iti umno a rason.
Nabaelan dagiti biktima a timmaray iti pagtaengan dagitoy idi nadlawda nga adda ti sugat iti paset ti bagi da.
Dagus a naitaray dagiti biktima iti ospital babaen kadagiti maseknan nga umili.
Nagsagrap ni Baliw-an ti sugat iti kaniggid nga imana bayat a nagsagrap met ni Batay-an ti sugat iti kaniggid a tiyanna a rason iti panakaipasidongna iti operasyon.
Nupay kasta, pimmusay ni Batay-an kabayatanna ti pannakatamingna iti nasao nga ospital.
Im-imbestigaran met ita ti La Trinidad MPS ti motibo ken pakabigbigan ti suspek.