Agpatpataming ita iti ospital ti maysa a barangay captain kalpasan a pinaltugan ti saan pay a nabigbig a suspek idiay Calumbitin, San Antonio, Bangued, Abra itay agsapa.
Nabigbig ti biktima a ni Barangay Captain Dennis Billedo.
Iti inisyal nga imbestigasyon dagiti otoridad, daldalyasaten da Kapitan Billedo ken dagiti kakadwana ti paset ti Sitio Calumbitin usar ti toyota vios idi killaat a pinaltogan ida ti saan pay a nabigbig a suspek.
Dagus met a naglibas ti suspek kalpasan ti pammaltog.
Sigun iti inisyal nga imbestigasyon, ti suspek ket nakasuot iti brown bonnet ken naka-full battle gear.
Narekober iti nakapasamakan ti insidente ti empty shells ti caliber 5.56mm.
Maipalagip nga idi metlaeng kalman, alas siete ti rabii ket adda ti napasamak a pammaltog idiay Turod, Zone 3, Bangued Abra a nangitunda iti ipupusay ti maysa nga indibidual.
Ti biktima ket nagsagrap iti tallo a tama ti paltog iti nagduduma a paset ti bagina.
Dagus met a nangipatungpal iti manhunt operation dagiti otoridad a nangitunda iti pannakatiliw ti suspek.