BAGUIO CITY | Naannayas ken naurnos ti night market bayat nga umadanin ti peak season iti Baguio City iti agdama a tawen.
Iti interview ti Bombo Radyo kenni Daryll Kim Longid, dadaulo ti Public Order and Safety Division, nakasaganadan para iti night market iti Harrison Road.
Kinunana a naurnos ken naannayas ti night market manipud nagrugi ti nasao nga aktibidad no idilig iti napalpalabas a tawen.
Innayonna a nagudwa ti schedule ti panaglako dagiti sangaribu a vendors nu sadino tunggal lawas ket ag-alternate dagitoy.
Daytoy ket para iti naurnos a panaglako dagiti vendor ken matagiragsakda ti nalawa nga espasyo ti exit ken entrance ti paglakoan.
Impetteng met ti opisyal a naideploy ti personnel daytoy partikular iti food section tapno agbantay ken sukimaten ti kinadalus ti uneg ti night market.
Kinunana a maipaay ti littering ticket kadagiti matiliwan nga aglabsing iti ordinansa ti siudad maipapan iti pannakaimanihar ti basura.
Kabyatanna, maipapaay met ti kanayonan a garbage receptacles iti tunggal stalls kasta met dagiti pagannurotan a kasapulan a tungpalen dagiti vendors.
Inyunay-unay met ni Longid nga agbalin kuma a responsable dagiti customers ken vendors para iti kinadalus ti uneg ti paglakuan.//Rosemarie Bulsao