BAGUIO CITY – Nilawlawagan ti Baguio City Police Office ti maibagbaga a nabuntog a panagresponde dagitoy iti napasamak nga aksidente iti fly over sadiay Magsaysay a nakatayan ti dua nga estudyante.
Iti interview ti Bombo Radyo Baguio kenni PLtCol. Judy Jasmine Palicos, panakangiwat ti BCPO, nagresponde a dagus ti BCPO Camdas Station 2.
Nupay kasta, inlawlawagna a saan a gaputa pulis ket dagus nga ag-imbestigar ken makibiang iti crime scene gaputa adda ti akem ti tunggal maysa kadagitoy.
Impetteng ni Palicos a dagus nga inyumanda ti nasao nga insidente iti Traffic Enforcement Unit, Emergency Unit para iti pannakaitaray dagiti biktima iti pagagasan.
Gapu iti dayta, impatangkenna a ‘very imposible’ a nabayag a narespondean ti insidente nangruna ta adda laeng iti siruk ti fly over ti istasyon ti pulisya.
Impaganetgetna a human error ti makitkita a rason iti napasamak nga insidente nangruna ta addaan iti impluwensia ti arak dagiti biktima.
Kabayatanna, naiyawid metten ti bangkay ti dua a biktima bayat a nakaruar metten iti ospital dagiti nadangran.
Maipalagip nga idi kalman ti parbangon ket paturong sadiay La Trinidad, Benguet ti Tammaraw FX a nagluganan dagiti biktima idi naidungpar daytoy iti concrete railings ti fly over sadiay Magsaysay a nangitunda iti ipupusay da Sasa ken Polano.
Kasaruno iti daytoy, ipalpalagipna manen ti BCPO ti panag-innayad ken ti panagtulnog dagiti motorista iti linteg trapiko tapnu maliklikan ti kapada nga insidente.
