𝐌𝐚𝐲𝐬𝐚 𝐧𝐠𝐚 𝐞𝐬𝐭𝐮𝐝𝐲𝐚𝐧𝐭𝐞, 𝐧𝐚𝐭𝐢𝐥𝐢𝐰 𝐤𝐚𝐥𝐩𝐚𝐬𝐚𝐧 𝐚 𝐧𝐚𝐠𝐭𝐚𝐤𝐚𝐰 𝐢𝐭𝐢 𝐦𝐚𝐲𝐬𝐚 𝐚 𝐬𝐮𝐩𝐞𝐫𝐦𝐚𝐫𝐤𝐞𝐭 𝐢𝐭𝐢 𝐁𝐚𝐠𝐮𝐢𝐨 𝐂𝐢𝐭𝐲

BAGUIO CITY- Natiliw ti maysa nga estudyante kalpasan a nagtakaw daytoy iti supermarket iti Baguio City itay laeng nabiit.

Ti suspek ket agtawen iti 19-anyos, 3rd year high school, tubo ti Caloocan City ken residente ti Bakakeng Sur, Baguio City.

Maibasar iti inisyal nga imbestigasyon, nakita ti security guard ti suspek a magmagna paruar iti supermarket a nakaiggem ti dakkel a black bag.

Dagus nga inasitgan ken sinukimat ti security guard ti linaon ti bag ti suspek ken ditoy a nadiskobre ti 26 a pedaso ti Lady’s Choice Mayo Doy nga aggatad iti P4,764.

Naduktalan a saan a nabayadan ti nasao nga items.

Gapu iti daytoy, naiturong ti suspek iti kustodiya ti pulisya ken manamnama a mapilaan daytoy iti kaso a panagtakaw.