BAGUIO CITY- Ibalballaag manen ti lokal a gobierno a mapilaan ti kaskenan a kaso dagiti prank callers ti Baguio 911 iti kanito a mabigbig ti kinasiasino dagitoy.
Naiyunay-unay a ti Baguio 911 helpline ket pagkamangan laeng nu adda ti emerhensia kas ti aksidente, uram, pakaseknan iti medikal, panagabuso, kalamidad ken daduma pay.
Ag-op-operate daytoy iti uneg ti 24 oras no sadino mabalin a maaccess babaen iti direct telephone calls wenno babaen iti Baguio in my Pocket application.
Sigun kenni Rodolfo Estillore Jr., maysa kadagiti operator ti 911, adayo nga ad-ado ti maaw-awatda a prank call no idilig kadagiti pudno nga agkasapulan ti tulong.
Dinakamatna nga iti maysa nga aldaw ket makaaw-awatda ti 200 a prank call.
Iti pakabuklan, nakaawat ti Baguio 911 helpline ti 36,670 nga awag sipud nangrugi ti operasion idi Oktobre idi napan a tawen no sadino 12,000 ditoy ket prank call bayat a 10,000 met ti dropped calls.
Sigun kenni ni Engr. Felipe Puzon, Executive Officer V ti City Mayors Office, napilaanen ti kaso nga unjust vexation ti dua a prank callers babaen iti personnel ti Early Warning and Surveillance Division ti City Mayors Office.
Kinunana a manarimaan ita ti panangbigbigda kadagiti daduma pay a prank callers babaen iti systematic tracing ken tagging.
