BAGUIO CITY-Tarigagay ti Cordilleran boxing champion a ni KJ Natuplag a maiyawed ti WBO Oriental Featherweight Championship belt tapno sumrek iti top 15 iti world boxing rankings.
Naituding a makalaban ti reigning WBC Asian Boxing Council featherweight champion ti Thailand a ni Boonrueang Phayom sadiay Dubai, UAE intun Nobiembre 12.
Sigun iti 26 anyos a boksingero manipud Ifugao nga adda daytoyen iti 100 a porsiento a kondisyon ken naileppas da metten ti naituding a sparring rounds daytoy kalpasan ti agarup tallo a bulan a training camp.
Maysa kadagiti imprioridad ti trainers ni Natuplag ti napartak a lateral movement, napintas a depensa ken opensa.
Pinagyaman pay ti promising pinoy champion ti kumpleto a suporta ti boxing promoter na ken ti Cordillera community wenno dagiti pada na nga OFWs gapu iti tulong ken assistance a maipaay kenkuana.
Impanamnama pay ti Igorot fighter nga ited na amin a kabaelan na tapno maiyawed na ti prestisyoso a korona.
Iggem ni Natuplag ti impresibo a ring record a 10 wins, 9 ditoy ket babaen iti knock outs ken 3 losses bayat a ti makalaban na ket addaan iti 10 wins ken maysa a pannakaabak.