𝗜𝗺𝗽𝗹𝗲𝗺𝗲𝗻𝘁𝗮𝘀𝘆𝗼𝗻 𝘁𝗶 𝗯𝗮𝗿𝗼 𝗮 𝗰𝗼𝗱𝗶𝗻𝗴 𝘀𝗰𝗵𝗲𝗺𝗲 𝗶𝘁𝗶 𝗽𝗮𝗻𝗮𝗴𝗯𝗶𝗮𝗵𝗲 𝗱𝗮𝗴𝗶𝘁𝗶 𝘁𝗮𝘅𝗶 𝘂𝗻𝗶𝘁𝘀 𝗱𝗶𝘁𝗼𝘆 𝘀𝗶𝘂𝗱𝗮𝗱 𝘁𝗶 𝗕𝗮𝗴𝘂𝗶𝗼, 𝗹𝗶𝗻𝗮𝘄𝗹𝗮𝘄𝗮𝗴𝗮𝗻 𝗻𝗶 𝗕𝗖𝗣𝗢-𝗧𝗘𝗨 𝗰𝗵𝗶𝗲𝗳 𝗣𝗮𝗻𝗮𝗯𝗮𝗻𝗴

BAGUIO CITY – Nangrugin ti coding scheme a nasken a suroten dagiti amin a taxi units nga agbibiahe ditoy Baguio City.

Maipalagip a nagleppas idi kalman ti odd-even scheme nga immunan a naipaulog a sursuroten dagitoy.

Iti panakiuman ti Bombo Radyo Baguio, kinuna ni PLtCol. Oliver Panabang, dadaulo ti Traffic Enforcement Unit ti Baguio City Police Office a maiyaplikar ti nasao nga scheme iti aldaw ti Lunes agingga Biernes bayat a nawaya amin dagiti taxi units a rumuar iti Sabado ken Dominggo.

Inlawlawagna a napagdesisyonan daytoy ti Techinical Working Group gaputa naobserbaranda nga agkurkurang ti pagluganan dagiti pasahero ita a panagtutudo.

Innayonna a babaen iti daytoy ket ad-addo a drivers ti matulongan gaputa ad-addo met ti taxi a rumuar iti inaldaw.

Nupay kasta, inaklonna a bummasit ti pamastrekan dagiti drivers ngem mangnamnama nga adda latta ti mailuganda a pasahero.

Impanamnama pay ni Panabang a mabaliwan manen ti nasao nga scheme iti kanito a maobserbaran a mangitunda daytoy iti nakaro a panakalugi dagiti taxi units ditoy Baguio City.