‘𝗠𝗮𝗵𝗶𝘆𝗮 𝗻𝗮𝗹𝗮𝗻𝗴 𝗸𝗮𝘆𝗼’
Dayta ti impeksa ni Mayor Benjamin Magalong kagiddan ti adu a panagleak ti sewerage iti siudad nangruna iti central business district.
Sigun iti pannakiuman ti media kenkuana, adu dagiti parikut kadagiti sewers iti siudad gapu iti kinaawan disiplina no sadinno adu dagiti basura a maibelbelleng kadagiti sewers kasta metlaeng kadagiti kanal.
Innayonna a dagiti sewerline ti kadawyan a mapulpulatan ti basura , langis, mantika , diapers ken daduma pay a kita ti basira a mangituntunda iti panakapullat dagiti kala ken panaglupyas dagiti sewerlines.
Kabayatanna, impeksa ni Rhenan Diwas, dadaulo ti City Environment and Parks Management Office (CEPMO), naabotan ti sumagmamano a paset ti sewer line isu’t gapunna a makauneg ti tudo ken rumrumwar daytoy kadagiti sewer manholes.
Innayon daytoy a kaaduan kadagiti sewerlines ket naaramid idi paylaeng 1980s.
Sigun kenkuana, kasapulan ti agarup P900-milyon para iti total rehabilitation dagiti main sewer pipe ti Central Business District maibasar iti panagadal dagiti engineers. // Bombo Noveh Organo
