BAGUIO CITY – Maipatungpal ita a bulan ti mass testing kadagiti kabalyo sadiay Wright Park ditoy siudad ti Baguio tapno mabigbig dagiti addaan ti Equine Infectious Anemia (IEA) wenno Swamp Fever.
Sigun kenni City Veterinarian Dr. Brigit Piok, mangalada manen ti samples kadagiti kabalyo kadwada dagiti personnel ti Regional Animal Diagnostic Laboratory ti Department of Agriculture-Cordillera.
Maibasar iti rekord ti City Veterinary and Agriculture Office, dumanon iti 21 a kabalyo ti nagpositibo iti EIA wenno Swamp Fever, pakairamanan dagiti 6 a kabalyo a natay gapu iti nasao a sakit ken 15 a kabalyo a naipasidong ti isolation.
Kinunana a puntiryada ita a lapdan ti panagwaras ti IEA kadagiti dadduma a kabalyo iti nalatak a parke.
Dinakamat ni Dr. Piok a ti nasao a sakit ket napartak a maiyakar iti dadduma a kabalyo babaen iti kagat ti lamok.
Kinunana nga iti kanito nga addaan ti maysa a kabalyo ti nasao a sakit ket saanen a maagasan daytoy.
