BAGUIO CITY – Agtultuloy ti panangisayangkat ti lesbian, gay, bisexual, transgender, queer wenno LGBTQ+ community iti nagduduma a programa kas paset ti kampanyada tapnu maipaka-awat iti publiko ti kinasiasino dagitoy.
Iti interview ti Bombo Radyo Baguio, kinuna ni LGBTQ+ advocate Francis Lopez a maawatanda no apay nga adda dagiti tattao a saan a maka-awat kadagiti miembro ti LGBTQ+ community gapu iti panakapadakkel ken pammati dagitoy.
Nupay kasta, impettengna a ti laeng kayatda ket ti panangtrato kadakauda ti publiko iti nasayaat a wagas, patas ken addaan ti respeto.
Nagyaman met daytoy iti lokal a konseho ti Baguio gapu iti naipasa a linteg a mangiparparit iti diskriminasyon gaputa nairaman dagitoy ken naipasigurado ti panakasalwadda manipud kadagiti insidente ti nakaro a diskriminasyon ken panagpapatay a kas iti mapaspasamak iti dadduma a lugar kadagiti miembro ti LGBTQ+ community.
Nagyaman pay daytoy kadagiti amin a pudpudno a kaalyado wenno mangsupsuportar iti LGBTQ+ community.
Malaksid iti daytoy, impannakkel ni Lopez ti panagbalin nga utek dagiti miembro ti LGBTQ+ community iti panakabukel dagiti programa para iti panagrekober ti turismo ti Baguio ken ti panagbalin nga aktibo dagitoy iti panakaipaay ti tulong kadagiti agkasapulan kabayatan ti agdama a pandemya ken kadagiti babbai a biktima ti kinaranggas.
Kagiddan iti daytoy, aw-awisen ti drag queen ti publiko iti panakipasetda iti dadduma pay nga aktibidad nga isayangkatda para iti selebrasyon ti Pride Month ditoy siudad.
Karaman kadagitoy ti panakailukat ti rainbow pedestrian crosswalk iti batog ti Rizal Park inton Sabado a giddanan ti mini-LGBT film festival a pakaibuyaan ti tallo a pelikula, libre nga HIV screening and counseling ken operation pukis a maysa a haircut for a cause.
Immunan a nangited daytoy iti pride flag a maiparang sadiay City Hall kas paset ti selebrasyon ti Pride Month ita a bulan.