BAGUIO CITY- Nailista ti Asipulo Municipal Police Station ti maysa a vehicular traffic accident sadiay Sitio Katul, Attaban, Amduntog, Asipulo, Ifugao iti alas tres ti malem idi kalman, Marso 17.
Nagresulta daytoy iti panakadangran ti tallo nga indibidual.
Maibasar iti report, rinespondean ti personnel ti Asipulo MPS, BFP, MDRRMO ken RHU ti natnag a loader iti rangkis nga addaan kauneg a 20 meters.
Imanmaneho daytoy ni Ryan Binwag Mon-ayao, 38-anyos ken residente ti Panopdopan, Lamut, Ifugao.
Naamoan a mangipatpatungpal ti loader ti road clearing operation idi naadaan ti mechanical problem ti preno a nangitunda iti panakadungpar ti dua a bystanders a da Joshua Cabbigat Tayaban ken Carins Gumangan Guindayan, agpada a laborer, 25-anyos ken residente ti Nepayew, Antipolo, Asipulo, Ifugao.
Gapu iti daytoy, bin-ig a natnag ti driver ken ti dua a bystanders iti rangkis rason a nagsagrapda ti multiple physical injury.
Naipaayan met ti first aid dagiti biktima iti Asipulo RHU ken naiturongda iti Panopdopan District Hospital, Bannit, Lamut, Ifugao para iti panagpa-agas dagitoy.
