BAGUIO CITY – Makaaw-awat iti nagduduma a komento ken reaksion ti maar-aramid nga istruktura iti rotunda sadiay Upper Session Road ditoy siudad ti Baguio.
Naawagan ti nasao nga istruktura iti TREE OF LIFE a nakaitampokan dagiti nagduduma a klase ti mula nga indisenyo ti Landscaping Team ti City Environment and Parks Management Office (CEPMO) ken maiyusuat inton Domingg, June 20.
Sigun kenni Atty. Rhenan Diwas, dadaulo ti CEPMO, ti Tree of Life ket paset ti selebrasyon ti kaunaan a Saleng Festival ti Baguio.
Kinunana a ti istruktura ket simbolo ti panagkaykaysa ken panagkakadwa gaputa napateg a maamiris dagiti tattao a kasapulanda ti tunggal maysa tapnu makalasat ken makarekober manipud iti agdama a pandemya.
Innayonna a kayatda pay a ma-apresiar ti publiko ti pintas ti panagnanayon dagiti kayo, sabong ken dadduma pay a klase ti mula iti sentro dagiti pasdek ken tarigagayda a maipakita a posible ti green architecture kadagiti patakder nga istruktura.
Kagiddan iti daytoy, aw-awisenna ti publiko iti panakipasetda iti serye ti tree-planting activities a maisayangkat manipud ita a bulan agingga inton Setyembre a paset ti kampanya ti lokal a gobyerno tapnu mapagbalin a berde ti aglawlaw ti siudad.
Naamuan a puntirya ti CEPMO a kabayatan ti Saleng Festival ti siudad ket maimula ti 10,000 a puon ti kayo.