𝟯 𝗮 𝗺𝗶𝗲𝗺𝗯𝗿𝗼 𝘁𝗶 𝗠𝗶𝗹𝗶𝘁𝗶𝗮 𝗻𝗴 𝗕𝗮𝘆𝗮𝗻 𝘁𝗶 𝗿𝗲𝗯𝗲𝗹𝗱𝗲 𝗻𝗴𝗮 𝗡𝗣𝗔 𝗱𝗶𝘁𝗼𝘆 𝗖𝗼𝗿𝗱𝗶𝗹𝗹𝗲𝗿𝗮 𝗥𝗲𝗴𝗶𝗼𝗻, 𝘀𝗶𝗺𝗺𝘂𝗸𝗼 𝗸𝗮𝗱𝗮𝗴𝗶𝘁𝗶 𝗼𝘁𝗼𝗿𝗶𝗱𝗮𝗱

BAGUIO CITY – Boluntaryo a simmuko kadagiti otoridad iti Benguet ken Abra ti tallo a miembro ti rebelde a New People’s Army (NPA) kas resulta ti agtultuloy a kampanya ti gobyerno tapnu maallukoy dagiti rebelde nga agsubli iti sidong ti gobyerno ken maaddaan iti nakappia a biag.

Sadiay Benguet, simmuko da alyas Noel, 28-anyos ken alyas Joey, 46-anyos kalpasan ti serye ti negosasyon.

Naamuan a miembro dagitoy ti Kilusang Larangan Gerilya (KLG) MONTES iti sidong ti Chadli Molintas Command ti Ilocos-Cordillera Regional Committee ti NPA nga addaan operasyon iti Benguet ken kadagiti kabangibang daytoy a probinsia.

Insuko met ni alyas Noel ti maysa a rifle ken dua a bala bayat nga insuko ni alyas Joey ti maysa a M1 Carbine, maysa a magazine, dua a bala ken dua a cartridge high explosives.

Sadiay Abra, simmuko ni alyas Ogie, 56-anyos, mannalon ken miembro metlaeng ti Special Unit Pangpolitika ti rebelde a grupo.

Iti agdama, adda ita iti kustodiya dagiti maseknan nga yunit ti pulisya ken militar dagiti nasao nga indibidual para iti debriefing ken umno a disposisyon.

Manamnama nga agnumar dagitoy iti Enhanced Comprehensive Local Integration Program ti gobyerno tapnu matulongan dagitoy a mangabaruanan kadwa ti pamilya dagitoy.