BAGUIO CITY – Impannakel ti Municipal General Services Office (MGSO) ti La Trinidad, Benguet ti 92% a panagtungpal dagiti umili sadiay iti paglintegan iti umno a panangisina-sina kadagiti maibelbelleng a basura.
Sigun kenni Dwight Daodao, dadaulo ti nasao nga opisina, naibasar daytoy iti kaudian a panagwanawan ti Monitoring Team ti MGSO ken ti Solid Waste Management Board.
Innayonna a dakkel pay a balligi ti panakaipatungpal ti Bantay Basura Program ti lokal a gobyerno ti La Trinidad malaksid iti napintas a panakitinnulong dagiti barangay officials kadagiti personnel ti MGSO tapnu mabantayan ken maipalagip kadagiti umili ti umno a panagibelleng ti basura kadagiti collection points sadiay.
Nupay kasta, innaklona a pagparparikutanda ti nabatbati nga 8% gaputa dagitoy dagiti saan nga agtungtungpal iti umno a waste segregation kas kadagiti agtataud iti trading post ken public market.
Naamuan a naisingaising metten iti Sangguniang Bayan ti La Trinidad ti panakaimuntar dagiti CCTV cameras kadagiti garbage collection points sadiay tapnu mabantayan a nalaing ti panagtungpal dagiti umili iti waste segregation policy.