BAGUIO CITY – Iyaw awis ti lokal a gobierno ti Baguio City iti publiko ti pannakipasetda iti Independence Day job fair a maipatungpal inton June 12 iti Bishop Carlito Cenzon open gymnasium sadiay Saint Louis University compound.
Sigun ken Doy Tabilog, executive assistant iti Mayor’s Office ken mangidadaulo ti Public Employment and Services Office (PESO), dumanon iti 1, 200 a trabaho ti maidiaya iti nasao nga aldaw manipod kadagiti nasurok 20 a local companies ken lima nga overseas manpower agencies.
Malaksid iti dayta, kinunana a karaman kadagiti makipaset iti daytoy dagiti service providers kas iti National Bureau of Investigation, Bureau of Internal Revenue, ken Social Security System.
Gapu iti dayta, maguyguyuguy kadagiti interesado a jobseekers a makipaset iti nasao nga aktibidad nangruna ta nalaklaka a panangiprosesoda kadagiti maikalkalikagum a documento para iti application dagitoy babaen kadagiti makipaset a service providers
Kinunana a maipatungpal babaen iti face-to-face ti nasao a job fair.
Innayunna a makipaset metlaeng ti Technical Education and Skills Development Authority ken Department of Trade and Industry babaen metlaeng iti panangipaayda iti serbisyo, impormasyon ken scholarship malakasid iti livelihood assistance ken opportunities.
Kadagiti interesado nga aplikante, nakalukat ita agingga June 11 ti pre registration sadiay People’s Park ken Department of Labor and Employment Baguio-Benguet Field Office sadiay Cabinet Hill, PESO iti Baguio City Hall, ken Barangay Employment Service Office (Baguio City).
