BAGUIO CITY – Malamlamayan ita ti maysa nga ubing a pimmusay kalpasan a nalmes bayat a mabirbirok ti kabsatna a naiyanod kalpasan a limned ti naglugananda a bangka iti karayan sadiay Sitio Compra, Barangay Pugol, Lamut, Ifugao idi kanikadua.
Nabigbig ti pimmusay a ni Micha Marzan Bermudez, agtawen iti dua, bayat a ti mapukpukaw a kabsatna ket ni John Mark Marzan Bermudez, agtawen iti lima, agpada a residente ti Pina, Diadi, Nueva Viscaya.
Maibasar iti imbestigasyon, paawid dagiti biktima ken nagluganda iti bangka kadwada ti inada a ni Jennelyn Marzan, 25, ken ti ipag daytoy a ni Vinnelyn Bermudez Dawing, 34.
Nupay kasta, simrek ti danum iti bangka dagitoy agingga a napunno ken limned, ket nalmes dagiti biktima.
Nabaelan da Ms. Dawing ken Mrs. Bermudez nga ingguyod ni Micha iti igid ti karayan ken nangipatungpalda iti first aid ngem saan a responsive ti biktima isut gapuna a nagpaarayat dagitoy.
Iti panagresponde dagiti kameng ti Lamut PNP, Municipal Disaster Risk Reduction and Management Council, barangay officials ken dagiti residente ket intarayda ti biktima iti Municipal Health Office ngem naideklara a dead on arrival.
Kabayatanna, agtultuloy ti search and rescue operation iti mapukpukaw a biktima.
