BAGUIO CITY–Pimmusay ti maysa a lalaki kalpasan a nabagsul bayat a nadangran ti maysa a lalaki ken maysa a babai a kadwa daytoy sadiay Upper Session Road, siudad ti Baguio idi rabii.
Nabigbig ti pimmusay a ni Raymart Sanches Torres, 25-anyos, construction worker ken residente ti Lower Cabinet Hill, Baguio City bayat a dagiti nadangran ket da Restlee Maglaya, 23-anyos, balasang, estudyante ken residente ti Loacan, Itogon, Benguet ken Fernando Sanches Torres, 28-anyos, construction worker, kabsat ti pimmusay ken residente ti Lower Cabinet Hill, Baguio City.
Maibasar iti report, nagturong iti maysa a balay-paginuman Session Road dagiti tallo a biktima ken ti dua pay a lallaki.
Nakatugaw met iti kaabayda a lamisaan ti grupo dagiti suspek ken iti awan umno a rason ket timmaud ti maysa nga argumento iti nagbaetan ti grupo dagti biktima ken grupo dagiti suspek.
Inanawa ni Maglaya ti dua a grupo ngem nagtultuloy latta ti argumento dagitoy iti ruar ti pasdek agingga a nagdidinnangran dagitoy ken sadiay metten a binagsol dagiti suspek ti biktima a ni Raymart Torres.
Nagsagrap ni Raymart Torres iti adu a saksak iti ngato a paset ti bagina ken dagus daytoy a naiturong iti pagagasan ngem pimmusay iti ala una idi parbangon.
Nagsagrap met ni Maglaya iti maysa a sasak iti kannigid a luppo bayat a nasaksak ti kanawan a paset ti bagi ken ti tiyan ni Fernando Torres.
Dagus a naglibas dagiti suspek kalpasan ti insidente.
Awan met ti nasalaw dagiti pulis kadagiti suspek iti panagresponde dagitoy.
