BAGUIO CITY – Malamlamayan ita ti maysa a misis kalpasan a nairaman iti panakauram ti dua a kadsaaran a balayda sadiay Soquib, Besao, Mountain Province itay parbangon.
Nabigbig ti pimmusay a ni Jane Mey-ang, 41, bayat a ti nadangran ket ti asawana a ni Noble Ayson Mey-ang, 43, agpada a residente iti nadakamat a lugar.
Maibasar iti imbestigasyon ti pulisya, matmaturog dagiti biktima iti maikadua a kadsaaran ken nariingda laengen gapu iti napuskol nga asok a nakapalawlaw iti balay dagitoy.
Nagkaradap ni Noble Mey-ang ken nabaelanna ti tumapwak manipud iti tawa ti maikadua a kadsaaran ti balayda bayat a nabati ti asawana.
Gapu iti daytoy ket nagsagrap ni Noble Mey-ang iti head ken back injuries malaksid pay iti 1st degree burn iti kanawan nga imana.
Naitaray daytoy iti Besao District Hospital bayat a narekober ti bangkay ti asawana kalpasan a naideklara ti fire out.
Mapattapatta a dumanon iti P200, 000 ti gatad dagiti nauram a kagawaan iti nasao a balay bayat a saan pay a maibaga dagiti imbestigador nu anya ti rason ti nasao nga uram.
