BAGUIO CITY–Nadangran ti walo nga indibidwal kalpasan a naidungpar, nagsikig ken nabaliktad ti nagluganan dagitoy a parapasahero a van sadiay Bawek, Taloy Sur, Tuba, Benguet itay agsapa.
Ti nasao a van ket imanmaneho ni Mark Kenneth Tumpalan, 28-anyos ken residente ti Tubao, La Union.
Segun kenni PCIns. James Acod, dadaulo ti Tuba Municipal Police Station, ti nasao a parapasahero a van nga addaan iti plaka a PN UVO 569 ket nagtaud ditoy siudad ti Baguio ken paturong iti probinsya ti La Union.
Kinunana nga iti panakipatangda iti driber ket inaklonna a naituruganna ti panagmeneho daytoy rason tapnu maidungpar ti van ken agsikig agingga a nabaliktad.
Iti agdama ket manarimaan pay laeng ti kanayunan nga imbestigasyon ti Tuba PNP iti rason ti nasao nga aksidente.//at
Kabayatanna, pimmusay ti maysa a negosyante kalpasan a natnag ti luganna a Tamaraw FX iti rangkis sadiay Nabalicong, Natubleng, Buguias, Benguet idi kalman.
Nabigbig daytoy a ni Sonya Mae Payangdo Jose, 43-anyos, naasawaan, negosyante ken residente ti Natubleng, Buguias, Benguet.
Maibasar iti report, naitaray ti biktima iti Atok District Hospital sadiay Atok, Benguet ngem naiyakar daytoy Baguio General Hospital.
Nupay kasta, naideklara daytoy a dead on arrival.
