BAGUIO CITY – Imimbestigaran dagiti otoridad ti napasamak a maatap a gas poisoning sadiay Sitio Fatima, Ucab, Itogon, Benguet idi malem kalman a nakatayan ti maysa a minero.
Immunan a nabigbig ti pimmusay a ni Allen Dao-as, 24, single bayat a dagiti agpapaimbag pay laeng iti ospital ket da Peter Ticag, 40, naasawaan, ken ni Benito Bolinget Lengwa, 26, naasawaan, a bin-ig a residete ti Madongo, Sagada, Mt. Province.
Iti interview nga impatungpal ti Itogon Municipal Police Station kadagiti biktima, naamoan a tinangdanan ni Jimmy Bawayan dagiti biktima nga agdalus iti impounding concrete tank ti tailing.
Immuna a simrek iti tangke ni Lengwa ken bayat ti panagdalusna ket narigatan daytoy nga aganges gapu iti kemikal isut gapuna a kiniddawna a sukatan daytoy ni Dao-as.
Bayat ti panagdalus met ni Dao-as ket narigatan met daytoy nga aganges isut gapuna nga intayagna ti imana tapnu agpatulong kadagiti kakadwana.
Nupay kasta, saan a naigemman nga usto ni Lengwa ti ima ni Dao-as isut gapuna a natalimudaw daytoy.
Dagus nga immuneg iti tangke da Lengwa ken Ticag tapnu tulonganda kuma ni Dao-as ngem sadiay a napakapsotanda isut gapuna a nagpukpukkawda iti tulong.
Naitaray dagitoy iti ospital ngem naideklara a dead on arrival ni Dao-as.
Kabayatanna, agrekrekober pay laeng ni Ticag iti Baguio Medical Center bayat a nasayaat metten ti kasasaad ni Lengwa iti Saint Luis Hospital.
