BAGUIO CITY – Malamlamayan ita ti maysa nga estudyante bayat nga agpapaimbag dagiti dua a kakadwana kalpasan a nairaman dagitoy aksidente a napasamak sadiay Barangay Chalalo, Aguinaldo, Ifugao idi malem kalman.
Nabigbig ti pimmusay a ni Ariel Liingnap Angowan, 16, grade 8 student ti Ubao National High School; bayat a dagiti nadangran ket da Mayrish Bakichan Nawalig, 18, 3rd year college iti IFSU Alfonso Lista, Ifugao ken ni Janice Guinomon, 25, bing-ig a residente ti Butac Aguinaldo, Ifugao.
Maibasar iti report, bayat ti panagsang-at ti jeep nga imanmaneho ni William Chipalang Polig, iti nasao a lugar ket killaat daytoy a nagsardeng ken nagatras agingga a naidungpar ti likod daytoy iti sand boulders.
Idi dimsaag ti driver ket nakitana ti pasahero a ni Angowan a nakabitin a naipit iti left rear ti lugan ken iti sand boulders.
Inikkatna ti naipit a bangkay ti biktima ken iti panagresponde dagiti pulis ket inturongda daytoy iti maysa a punerarya sakbay a naiyawid iti balay dagitoy bayat a naitaray met iti ospital dagiti nadangran a kakadwana.
