BAGUIO CITY – Malamlamayan ita ti maysa a construction worker a pimmusay kalpasan a naidungpar ken nabaliktad ti naglugananda a truck nga addaan iti plaka a PN UTI 157 sadiay Lower Manga, Tuding, Itogon, Benguet idi kalman.
Nabigbig ti pimmusay a ni Jun Balingan Cuengan, 48, single, ken residente iti nasao a lugar bayat a dagiti nadangran ket da Erwin Ravago Diase Jr., 43, married, residente ti Trail Tuding, Itogon, Benguet a driver ti nasao a truck, ken ni Winsly Segundo Alonzo, 42, married, ken residente ti Proper Tuding, Itogon, Benguet.
Maibasar iti report ti pulisya, addaan iti karga a graba ken sangapulo ket dua nga steel bar ti nasao a lugan.
Pasalog ti truck iti kalsada ngem gapu iti kinadagsen ti karga daytoy ket nagdirdiretso ti lugan isut gapuna nga indungpar daytoy ti driver iti igid ti kalsada agingga a bimmaliktad.
Gapu iti daytoy ket nagsagrap iti dunor ti driver pakairamanan da Alonzo a nakatugaw iti passenger’s seat ken ni Cuengan nga adda iti likod ti truck.
Naitaray dagitoy iti Baguio General Hospital ngem naideklara a dead on arrival ni Cuengan gapu iti nakaro a linak-amna a dunor.
Iti agdama ket agtultuloy ti imbestigasyon dagiti otoridad iti nasao nga aksidente.
