BAGUIO CITY – Imimbestigaran dagiti pulis ti napasamak a panagbettak iti maysa a balay sadiay Brgy. Musimut, Kabugao, Apayao a nakatayan ti maysa nga ina ken nakadangran ti dua a dadduma pay idi kalman.
Nabigbig dagitoy a da Brihida Taan Tagguid, 57, bayat a dagiti nadangran ket da Susing Taan Tagguid, 13, grade 6 student ken ni Magsaysay Saleng Tagguid, 62, a bin-ig a residente iti nasao a lugar.
Segun iti Kabugao Municipal Police Station, matmaturog dagiti biktima iti kusina ti balay dagitoy idi naaddaan iti panagbettak.
Intaray dagiti kaarubada dagiti biktima iti Apayao Provincial District Hospital sadiay Poblacion, Kabugao ngem naideklara a dead on arrival ni Brihida Tagguid.
Naiyakar met sadiay Tuguegarao City ti dua a nadangran para iti kanayunan a treatment dagitoy.
Mapapati met a gas leak ti rason ti nasao a panagbettak.
