BAGUIO CITY – Pimmusay ti maysa nga indibidual bayat a nadangran ti tallo a kakadwana kalpasan a natnag iti rangkis ti naglugananda nga SUV sadiay Km. 57, Cattubo, Atok, Benguet idi kalman ti agsapa.
Nabigbig ti pimmusay a ni Jaquelyn Mayos, 31-anyos, residente ti Buguias, Benguet.
Nabigbig met dagiti nadangran a da Johnlo Gayodan, 52-anyos, driver; Letisha Waclin, 42-anyos, agpada a residente ti Bauko, Mountain Province ken ni Joe Mayos, 41-anyos, residente ti Buguias, Benguet.
Iti interview ti Bombo Radyo Baguio, kinuna ni PCapt. Jayson Eugenio, hepe ng Atok Municipal Police Station a nagtaud ti kotse sadiay Buguias, Benguet ken paturongda iti Baguio City.
Nupay kasta, kabayatan ti panagsalog ti kotse iti kalsada ket nag-overtake ti driver a ni Gayodan iti paset ti sharp curve.
Kinunana a saan a nakontrol ni Gayodan ti manibela a nagresulta tapnu agsikig ti lugan agingga a natnag iti rangkis nga addaan kauneg a mapattapatta a 160 a metro.
Dagus a naisayangkat ti rescue operation ken naitaray dagiti biktima iti Atok District Hospital sadiay Sayangan, Paoay, Atok ngem naideklara a dead on arrival ni Jaquelyn Mayos gapu iti nasagrap daytoy a traumatic head injury.
Naiyakar met iti Benguet General Hospital da Gaydan ken Waclin bayat a nakaruar iti pagagasan ni Joe Mayos.
Naamuan iti hepe nga adda ti kapada nga insidente a napasamak iti nasao a disso idi 2017 ngem agingga ita ket awan ti naiyaramid sadiay nga alad.
Gapu iti napasamak ket impalagipna manen ti kanayon a panagannad dagiti motorista kabayatan ti panagmanehoda tapnu maliklikan ti kapada nga aksidente.
