BAGUIO CITY – Pimmusay ti maysa nga empleyado ti gobyerno bayat nga agtaltalinaed iti pagagasan ti tallo a kakaduana a nadangran iti panakatnag ti maysa a hilux iti rangkis sadiay Bowalan, Poblacion, Kibungan, Benguet idi kalman.
Nabigbig ti pimmusay a ni Jonathan Molitas Dulay, 37-anyos bayat a nabigbig dagiti nadangran a da Octavio Obinario Pis-et, Arthur Lagawad Mayos ken ti driver a ni Milando Claudio Benito a bin-ig nga empleyado ti lokal a gobyerno ti Kibungan, Benguet.
Sigun kenni PSI Marshall Valdez, hepe ti Kibungan PNP, napasamak ti aksidente kalpasan a nagibelleng iti basura dagiti biktima iti dumping site iti nasao a lugar.
Kinunana a napukawan iti preno ti hilux agingga a natnag daytoy iti rangkis nga addaan kauneg nga agarup 30 a metro.
Dagus a naiturong dagiti biktima iti Kibungan Rural Health Unit ken sadiay a pimmusay ni Dulay bayat a naiyakar sadiay Benguet General Hospital dagiti kakadua daytoy.
