BAGUIO CITY – Sumangsango iti kaskenan a kaso ti driber ti FX nga addaan iti plaka nga TMU-492 a natinnag iti maysa a rangkis sadiay Bobok-Bisal, Bokod, Benguet idi rabii ti Sabado.
Sigun kenni PCI Carolina Lacuata, public information officer ti Police Regional Office Cordilla, nagresulta ti nasao nga insidente iti ipupusay ti maysa a baket ken nakadangran ti innem pay a kakadua daytoy a pasahero.
Nabigbig ti pimmusay a ni Luna Agsawal Ananayo, agtawen iti 66.
Kabayatanna, dagiti nadangran ket da Clarita Ananayo, agtawen iti 54; Daniel Dapiawen, agtawen iti 53, driver ti nasao a lugan; Marciana Dapiawen, 52; Jerry Tayambong, 42; Rojohn Tayombong, 15 ken ti barangay kagawad a managan iti Martes Pallay ken bin-ig dagitoy a residente ti Canabay, Dupax del Sur, Nueva Vizcaya.
Nakaruaren iti pagagasan ti dua kadagiti nadangran bayat a malamlamayanen ti bangkay ti pimmusay.
Maibasar iti imbestigasion, manarimaan ti panagdaliasat ti lugan iti nasao a lugar idi napukawan iti kontrol iti manibela ti driber a nangitunda iti pannakatnag ti lugan iti rangkis.
