BAGUIO CITY – Im-imbestigaran ita dagiti otoridad ti napasamak a panagpalpaltog iti uneg a mismo ti Philippine Military Academy (PMA) itay alas-4:50 ti malem a nagresulta iti panakatay ti maysa a soldado ken panakadangran ti dua a dadduma pay.
Nupay saan pay a binigbig ti PMA dagiti nasao a soldado, kinuna ni PMA spokesperson Capt. Cheryl Tindog a dagitoy ket enlisted personnel a nakadestino iti akademya.
Iti inisyal nga imbestigasyon dagiti pulis, adda iti maikadua a kadsaaran ti barracks-da ti dua nga Staff Sergeants na biktima idi killaat a nagpalpaltog ti suspek a maysa nga Air Force Airman Second Class.
Maatap a pinalpaltogan ti suspek dagiti biktima babaen iti issued firearm daytoy nga M16 rifle.
Naamuan a maysa kadagiti biktima ti naki-innagaw iti paltog ti suspek ngem natamaan met daytoy.
Dagus a naitaray dagiti tallo iti PMA Station Hospital ngem naiyakarda iti Baguio General Hospital and Medical Center.
Nupay kasta, maysa kadagiti biktima ti pimmusay.
Kabayatanna, kinuna ni Capt. Tindog a natalged latta dagiti kadete gaputa adayo dagitoy iti nakapasamakan ti insidente.
Impanamnama met ti liderato ti PMA nga agbalin a patas ti imbestigasyon iti insidente.
