![](https://img.bomboradyo.com/baguio/2021/07/10-a-diskwento-iti-tuition-fee-dagiti-annak-dagiti-solo-parents-8.jpg)
BAGUIO CITY – Saan a pabor ti asosasyon dagiti pribado a pagadalan ditoy siudad ti Baguio iti 10% a diskwento iti tuition fee a maipaay kadagiti annak dagiti solo parents.
Sigun kenni Councilor Lilia Fariñas, dadaulo ti Committee on Social Services, Women and Urban Poor iti lokal a konseho ti Baguio, naiwaragawag ti nasao a takder kabayatan ti naisayangkat a konsultasyon para iti maisaksakad a panaka-amyendar ti ordinansa a mangipapaay ti kanayonan a tulong kadagiti solo parents ken kadagiti annak dagitoy ditoy siudad.
Kinunana a panggep ti konsultasyon a maamuan ti takder dagiti maseknan iti nasao a panag-amyendar.
Inlawlawagna nga iyap-apela dagiti pribado a pagadalan ti panaka-ikkat ti nasao a probisyon gaputa saan a kabaelan dagitoy a maipaay ti diskwento nangruna ta umad-ado nga umad-ado dagiti solo parents iti siudad.
Innayonna nga impeksa metlaeng dagiti pribado a pagadalan nga agingga ita ket agrekrekober paylaeng dagitoy manipod iti nagbalin nga epekto ti agdama a pandemya iti sektor ti edukasyon.