BAGUIO CITY – Dumanon iti agarup sangapulo a Higher Education Institutions (HEIs) iti Benguet ken Baguio City ti nagaplikar para iti panakaisayangkat ti nalimitaran a face-to-face ita a tawen kadagiti HEIs nga immunan nga impalubos ni Presidente Rodrigo Duterte.
Iti panaki-uman ti Bombo Radyo Baguio, kinuna ni Commision on Higher Education (CHED) – Cordillera OIC Regional Director Dr. Danilo Bose a karaman kadagiti nasao a pagadalan ti AMA College, Baguio Central University, Easter College, Pines City College, Saint Louis University, University of Baguio ken University of the Cordilleras iti Baguio City.
Dinakamatna nga iti met Benguet ket ti Benguet State University, Cordillera Career Development College ken BVS college.
Nupay kasta, linawlawaganna nga innem laeng a kurso nga addaan amin pakainaigan iti salun-at ti pinatgan ni Presidente Duterte a mailukat iti limited face-to-face classes.
Kinunana a dagitoy a kurso ti naipangruna gaputa dagitoy ti kasapulan ti pagilian ita a mapaspasaran ti pandemya.
Imbinglayna metlaeng a magna dagiti nagaplikar iti nainget a proseso sakbay a makedngan no maaprobaran ti aplikasyon dagitoy para iti limitado a face-to-face classes.
Innayonna a mangisayangkat iti inspeksion ti CHED, Department of Health-Cordillera, IATF ken dagiti maseknan a lokal a gobyerno kadagiti nasao a pagadalan tapnu makita no kabaelan dagitoy nga isayangkat ti limited face-to-face classes nga addaa nainget a paglintegan kontra iti COVID-19.
