Inwaragawag ni court spokesperson Regie Tongol nga umdas ti 10 a senador a mangballikug iti pangngeddeng ni Senate impeachment court presiding officer Francis Escudero a kasapulan ti 16 a botos tapno ma-impeach ni Vice President Sara Duterte.
Kadagiti 24 a senador, uppat ti agdama nga absent bayat a saan a makipaset ni Senator Escudero.
Gapu iti dayta, 19 laeng a senador ti mangikeddeng iti daytoy a banag inton Setiembre 23.
Iti sidong ti simple a majority vote, inlawlawag ni Tongol a kayat a sawen daytoy a 10 laeng a senador ti kasapulan tapno mabaliktad ti 16-vote threshold para iti pannakakonbiktar.
Iti agdama, nakabalud da Senador Jinggoy Estrada ken Rodante Marcoleta gapu iti kaso a plunder, idinto nga aglemlemmeng ni Senador Ronald “Bato” dela Rosa iti baet ti arrest warrant nga impaulog ti International Criminal Court (ICC) mainaig iti war on drugs ti administrasion ni sigud a President Rodrigo Duterte.
Kabayatanna saan a dimardar-ay ni Senator Loren Legarda iti trial iti sumagmamano a lawas bayat nga agtaltalinaed iti ballasiw-taaw gapu iti pannakailaylayun ti medical leave daytoy.
Nupay kasta, kinuna ni Tongol nga adda pay laeng ti posibilidad a nasurok ngem ti manamnama a 20 a senador-judge ti mabalin a makipaset iti aldaw ti panagbutos.
