BAGUIO CITY – Gumatang ti lokal a gobierno ti siudad ti Baguio iti 10,000 a test kits ken RT-PCR machine para iti panggep a mass testing iti COVID-19 ditoy siudad.
Binilin ni Mayor Benjamin Magalong dagiti maseknan nga opisina tapno maisagana dagiti masapul a dokumento iti pannakagatang ti 10,000 a reverse transcriptase polymerase chain reaction-based test kits.
Sigun ken ni City Health Officer Dr. Rowena Galpo, mangilatang ti lokal a gobierno iti P10 million a pondo para iti pannakagatang ti 10,000 test kits ken kanayonan a P5 million a pondo para iti pannakagatang ti RT-PCR machine.
Kinunana nga ekslusibo a maaramat dagiti test kits ken RT-PCR machines kadagiti residente ti siudad ti Baguio.
Innayonna a maipangruna iti mass testing dagiti health workers, dadduma pay a fronliners, barangay officials, contact tracers, dagiti nakapulapol dagiti positibo iti COVID 19 ken dadduma pay nga indibidual.
