Manamnama a maipaayan dagiti agarup sangagasut a ribu a sigud a kameng iti rebelde ti benepisio manipud iti gobierno, babaen iti programa nga amnesty program sigun iti National Amnesty Commission (NAC) idi kalman, Mayo 18 iti agdama a tawen.
Sigun kenni Nasser Marohomsalik, Commissioner ti National Amnesty Commission, kangrunaan kadagiti aplikante a manamnama a maipaayan dagiti manipud iti Moro Islamic Liberation Front (MILF) ken grupo dagiti leftist.
Malaksid iti dayta, manamnama a maipaayan dagiti sangaribu iti Moro National Liberation Front, no pay kasta saan dagitoy a nangipaay ti esakto a bilang dagiti posible a maipaayan iti nasao a programa.
Kabayatanna, karaman dagiti sigud a kameng ti Communist Party of the Philippine-New People’s Army- National Democratic Front (CPP-NPA-NDF) ti maipaayan iti nasao a benepisio.
Maipalagip nga inpaulog ni President Ferdinand Marcos Jr. ti Proclamation No. 403, 404, 405, ken 406.
No sadino, maipaayan iti amnestia dagiti grupo ti Rebolusyonaryong Partido ng Manggagawa ng Pilipinas/Revolutionary Proletarian Army/Alex Boncayao Brigade (RPMP-RPA-ABB)Communist Party of the Philippines-New People’s Army-National Democratic Front (CPP-NPA-NDF) ken dadduma pay idi napalabas a Nobiembre idi tawen dosmil baente tres.
