Naipila iti opisina ti Commission on Elections ti 104 a kaso a mangkidkiddaw iti pannakaideklara dagiti dadduma kandidato iti 2025 midterm elections kas nuisance candidates.
Sigun iti clerk office ti COMELEC, amin dagitoy a kaso ket maad-adal pailaeng iti agdama.
Malaksid iti daytoy, dinakamat ti nasao nga ahensiya nga adda ti naawatda metlaeng a 117 special action cases motu proprio, 24 special action cases para iti pannakakanselar ti certificate of candidacy dagiti dadduma a kandidato ken maysa a kaso para iti pannakadiskwalipikar ti kandidatura.
Gapu iti daytoy, pakabuklanen a 246 a kaso ti naawat ti komisyon nga adda pakainaiganna iti 2025 midterm elections.
Immuna metten nga impanamnama ni COMELEC Chairman George Garcia bayat ti interview ti Bombo Radyo Baguio kenkuana a risutenda dagiti nagduduma a kaso a maawat ti opisinada.
Maipalagip a nangrugi ti panangipila iti certificate of candidacy idi Oktobre 1 ken nagleppas daytoy idi Oktobre 8 nu sadino 183 a kandidato ti agngayangay iti kina-senador ken 156 met iti kina-partylists.
