BAGUIO CITY – Inaklon ni Department of Agriculture- Cordillera Regional Director Cameron Odsey a dumanonen iti 108 a babbarangay manipod iti innem a probinsia ti rehiyon ti apektado iti panagraira ti African Swine Fever (ASF).
Kinunana a masarakan dagitoy iti 43 a munisipyo ti probinsia ti Apayao, Abra, Benguet, Ifugao, Kalinga ken Mt. Province.
Gapu iti daytoy, dumanonen iti 2,841 dagiti mannalon ti apektado ti ASF iti rehiyon a buklen dagiti 838 a mannalon sadiay Kalinga; 658 iti Benguet; 621 iti Mt. Province; 326 sadiay Apayao; 275 ti Abra ken 123 iti Benguet.
Dumanon met iti 8,607 dagiti baboy a naipasidong iti depopulation nu sadinno pakairaman ditoy ti 5,063 a kangatoan a bilang dagiti baboy manipod iti probinsia ti Ifugao.
Imbinglay pay ni Dr. Odsey nga nailista ti 232 nga kaso ti ASF kalpasan ti 85 a kaso ti Apayao; 57 sadiay Kalinga; 31 iti Benguet; 26 iti Ifugao; 21 ti Abra ken 12 iti Mt. Province.
Naduktalan met nga 5 ti nagtuadan ti ASF outbreak iti rehiyon nu sadinno dakkel a porsiento ti intunda ti pannakagatang wenno iseserrek dagiti stocks manipod kadagiti lugar nga apektado ti ASF.
Maibasar iti kaudian nga inventory ti DA-CAR, dumanon iti 23,815 ti pakabuklan a bilang ti baboy nga itartaraken dagiti backayard hog raiser iti rehiyon.
Kabayatanna, nabaelan ti ahensia nga ipaay ti nasurok P19-M a pondo kadagiti 860 a mannalon a benipisaryo ti ASF indemnification program ti gobierno kas tulong tapnu makarekober dagitoy iti epekto ti ASF manipod idi napalabas a tawen agingga idi Hulyo 2021.
