BAGUIO CITY – Naipaayan iti citation stickets ti 11 nga establishimento ditoy Baguio City gapu iti panaglabsingda iti Smoke-Free Baguio Ordinance.
Kasaruno daytoy ti naisayangkat a monitoring operation dagiti personnel ti Smoke-Free Task Force kadagiti business establishments iti masakupan ti Balsigan ken San Vicente.
Sumagmamano kadagiti panaglabsing a nailista ti task force ket ti panakailako dagiti produkto a tabako nga awanan ti business permit nga aglako kadagitoy ken per stick a panaglako ti sigarilyo.
Naduktalan pay nga adda dagiti menor-de-edad nga agilaklako ti sigarilyo.
Gapu iti daytoy, ipalpalagip manen ti Smoke-Free Task Force kadagiti business establishments ti panagtungpal dagitoy iti Smoke-Free Baguio Ordinance.
Nangiwarasda pay kadagiti babasaen a mangguyguyugoy iti publiko iti panagliklikda nga agaramat ken gumatang ti sigarilyo, vapes ken napagango a bulong ti tabako.
Maipalagip a nabukel ti Smoke-Free Baguio Ordinance tapnu maisardeng ti panagsigarilyo kadagiti parapubliko a lugar, panakailako dagiti produkto a tabako ken e-cigarettes wenno vapes.
Puntirya ti ordinansa a maprotektaran ti publiko manipud iti napeggad nga epekto ti panagsigarilyo ken dagiti produkto ti tabako.
