ITOGON, BENGUET- Nadangran ti 11 nga indibidual kalpasan ti aksidente ti lugan a napasamak iti paset ti Baloy Road idiay Itogon, Benguet idi Mayo 18, 2026.
Maibasar iti inisyal nga imbestigasion ti Itogon Municipal Police Station, mechanical error ti rumrumuar a rason iti napasamak nga insidente.
Iti pannakiuman ti Bombo Radyo kenni PCpl. Josua D. Cabuten ti Itogon MPS, kinunana a nagsardeng ti Public Utility Vehicle (PUJ) iti pasang-at a kalsada kalpasan a bimmaba ti maysa a pasahero.
Nupay kasta, immatras iti garup 10 meters ti kaadayona manipud iti nagsardengan daytoy.
Naglaun ti lugan iti 21 a pasahero a pakairamanan dagiti menor de edad ken natataengan.
Sigun kenni PCpl. Cabuten, nagtaud ti lugan iti siudad ti Baguio ken paturong idiay Binga, Itogon idi napasamak ti insidente.
Nakaruar metten amin dagiti biktima iti ospital bayat a maur-uray paylaeng ti resulta ti panagsasarita ti driver ken dagiti pasahero.
Iti agdama, agtultuloy paylaeng ti imbestigasion dagiti otoridad iti napasamak nga insidente.//mp4
