BAGUIO CITY – Nabigbig ti 11 a local government units (LGUs) ken dua a civil society organizations (CSOs) ditoy rehion Cordillera gapu iti napintas a naaramidda iti akemda a katulongan ti nasyonal a gobyerno iti programa kontra iti iligal a droga iti baet ti agdama a pandemya.
Nabigbig pay dagitoy gapu iti kinapasnekda iti panakaparmek wenno panakadalus ti lugarda manipud iti iligal a droga babaen iti drug prevention programs kadagiti napalpalabas a tawen.
Napadawayan dagiti munisipyo ti Buguias, Kibungan ken La Trinidad iti Benguet; ti Pudtol, Luna, Conner ken Santa Marcela iti Apayao; ti Pilar, Tineg, Lacub ken San Juan iti Abra gapu iti panangragpatda iti 100 percent performance iti maseknan a local anti-drug abuse council dagitoy.
Napadayawan met ti Council for the Restoration of Filipino Values ken ti Shalom Kalinga gapu iti kinagagetda a mangipatungpal kadagiti anti-illegal drug programs dagitoy iti baet ti pandemya.
Agtalek ti Department of the Interior and Local Government ken ti Philippine Drug Enforcement Agency iti kina-epektibo ti Barangay Drug Clearing Program kas whole-of-nation approach iti panakarisut ti parikut iti iligal a droga iti pagilian.
