BAGUIO CITY – Nakastrek dagiti 11 a wrestlers a mangibagi iti siudad ti Baguio iti weigh-in para iti ay-ayam a wrestling iti manarimaan a 2017 Kurash National Championships.
Sigun kenni head coach Christian Gazmin, 13 amin dagiti wrestlers manipud iti siudad ngem no bigat ti weigh-in dagiti dua.
Dinakamatna a lima kadagiti nasao nga atleta ket babbae ken makipaset dagitoy iti free-style division.
Innayonna a makatawen a nagsagana dagitoy para iti nasao a kompetisyon ngem iti naudi nga uppat a lawas ket nagbalin a naing-inget ti panagsanay dagitoy.
Agserserbi ti 2017 Kurash National Championships kas qualifying tournament ken panggep daytoy a mapili dagiti atleta a makipaset iti Team Philippines iti 5th Asian Indoor and Martial Arts Games a maangay to sadiay Turkmenistan inton September.
Kabayatanna, kinuna met ni City Sports Development Officer Gaudencio Gonzales a nangipaay ti lokal a gobyerno ti Baguio iti suporta babaen iti panang-sponsor daytoy iti pamasahe, registration fee ken allowance dagiti nasao nga atleta.
