Dumanon iti 110 a Person Deprived of Liberty ti nakwalipikar nga agbotos para iti umadanin a 2025 National ken Local elections inton Mayo a dose iti agdama a tawen.
Sigun kenni Jail Chief Inspector John Waylan Lapon, warden ti Baguio City Jail–Male Dorm, dagiti nakwalipikar nga agbotos ket nagrehistro iti Commission on Elections (Comelec) babaen iti mobile registration.
Naituding met a mangipaay ti nasao a poll body iti guidelines kadagiti person deprived of liberties nga agbotos inton aldaw iti eleksyon.
Maipalagip a kadagiti napalpalabas nga eleksyon, dagiti balud ket mapalpalubosan nga agbotos kas nakalanad iti 1987 constitution gapu ta maysa daytoy a karbenganda.
Kabayatanna, nagyaman ni Lapon iti lokal a gobyerno iti siudad gapu iti agtultuloy a panagsuportada kadakuada babaen iti panakaipaay ti pondo dagitoy tinawen kasta met ti panagipaayda iti health care ken social services kadagitoy.
