BAGUIO CITY – Rambakan ti munisipyo ti Bauko, Mt. Province ti maika-11 a ‘Begnas di Bauko’ manipud March 9-11.
Addaan daytoy iti tema a “Gabay di esek, sikan di ipogaw, bikas di umili, katagtaguan di sasayangdan.”
Manamnama nga iparang dagiti 22 a barangay ti Bauko ti bukod ken naisangsanagayan a features ken products dagitoy bayat ti selebrasyon.
Ti ‘begnas’ ket kultura ti panagyaman kadgiti kankana-ey ti Bauko a tinawen a maramrambakan tapnu pagyamananda ni Kabunyan ken ti ispiritu dagiti allapo kagiddan ti panagkiddawda iti pabor mainaig iti socio-economic ken political concerns ti komunidad.
Agserbi ti selebrasyon saan laeng a para iti panagragragsak ngem ketdi, kas tali a mangreppet iti munisipyo para iti panagkaykaysa dagitoy.
Karaman kadagiti aktibidad ti ‘Begnas di Bauko’ ti cultural presentations inton March 9, agricultural ken livelihood products fair, tours iti nagduduma a tourism destination sadiay, pounding rice challenge, “sabeng” cooking contest, ken ti “anap di bangan.”
Tampok met inton March 10 ti folk dances, ballroom dancing ken panagkankanta dagiti ubbing, nagannak ken dagiti singing priests.
Panagragragsak met iti March 11 babaen kadagiti nainsigudan nga ay-ayam.
