BAGUIO CITY – Nakastrek ti maysa nga estudyante manipud Baguio City iti grupo dagiti agtutubo a mangbukel iti kabaruan nga All-Stars ti 2018 Junior NBA Philippines.
Balligi a nakastrek iti 11th batch ti 2018 Junior NBA All-Stars ti dose anyos a ni Christine Nichole Venterez manipud iti Baguio City National High School ken makaduana ti walo a barito ken pito a balasitang.
Napili dagitoy manipud kadagiti 74 a participants iti National Training Camp a napili metlaeng manipud kadagiti top performers ti Regional Selection Camps iti nagduduma a paset ti pagilian.
Indauluan da Sacramento Kings center Willie Cauley-Stein ken Women’s NBA Hall of Famer Sheryl Swoopes ti nasao a national training camp a nangipakitaan dagiti All-Stars iti abilidad dagitoy iti basketball court ken iti Junior NBA core values nga sportsmanship, teamwork, positibo nga ugali ken respeto.
Nabigbig met kas maysa iti dua a Coaches of the Year ni Hazel Yambot manipud Baguio City.
Naituding nga agturong da Venteres sadiay Shanghai, China inton Oktobre para iti naidumduma nga NBA experience trip ken makaduada pay dagiti Junior NBA All-Stars ti Indonesia, Malaysia, Singapore, Thailand ken Vietnam kadagiti panagsanay ken friendly competitions.
Buyaenda pay ti NBA China Games 2018 a pakaitampokan ti ay-ayam ti Philadelphia 76ers ken Dallas Mavericks.
